Кога инвестираме во образованието, ние инвестираме во нашите деца за да овозможиме да стекнат нови вештини и да ги развијат своите капацитети. Тоа значи дека овозможуваме да бидат поподготвени да влезат во нови предизвици и да создадат подобра иднина за себе и за својата земја, рече Рејчел Галовеј, амбасадорка на Обединетото Кралство во земјава, вчера на отворањето на конференцијата посветена на врската меѓу добросостојбата и постигнувањата на децата. Конференцијата што во хотелот „Александар Палас“ ја организира Владата, заедно со Амбасадата на Обединетото Кралство и УНИЦЕФ во земјава трае два дена со излагања и дискусии на важни чинители на образовниот процес кај нас.
На конференцијата се обрати и премиерот Димитар Ковачевски.
– Ја гледам оваа конференција како сериозен ресурс на сознанија и препораки кои се добредојдени во креирањето политики за децата во образовниот процес и на синергијата на тие политики врз програмите на Министерствата за образование и наука и за труд и социјална политика – рече Ковачевски.
Конференцијата истражува како родителството, предучилишното и основното образование да ги поддржат напорите за изнаоѓање рамнотежа меѓу стремежот за иновации, конкурентност и напредок со едновремено промовирање солидарност, добросостојба и холистички развој на секое дете.
– Поддршката што им ја даваме на децата во текот на детството е најголемата можна инвестиција што една земја може да ја направи во насока на посигурна, отпорна, одржлива и просперитетна иднина. Мора да им помогнеме на децата да станат отпорни за да се справат со неизвесноста, а исто така мора да ги поддржиме да стекнат вештини што им се неопходни за обликување на подобра иднина за сите” – рече претставничката на УНИЦЕФ Патриција ДиЏовани.
Поаѓајќи од ставот дека основите на емотивната добросостојба и менталното здравје се градат во раното детство, првиот ден од конференцијата ги истражуваше различните начини на негување холистички развој на децата во раното детство во градинките и дома.
– На сите семејства им е потребна поддршка во растењето и воспитувањето на децата, но на ранливите семејства, кои се соочуваат со дополнителни предизвици, како сиромаштија, инвалидитет или социјална исклученост, им треба уште поголема помош, и тоа преку сеопфатни услуги од полето на социјалната заштита, здравството и образованието – рече министерката за труд и социјална политика Јованка Тренчевска.
На тема „Социјално и емоционално учење во занималните/Моменталната состојба и следните чекори“, дебатираа универзитетските професори Кирил Барбареев, Лена Дамовска, претставници на градинки, на ресорното министерство. Денешниот ден ќе биде посветен на образовниот систем и можностите и ризиците што произлегуваат од дигитализацијата и важноста од психо-социјална поддршка и добросостојба во текот на образовниот процес и подоцна во зрелата возраст.
Конференцијата ќе заврши со дополнителни согледувања и заклучоци во три области: програми и политики за родителите за да развијат родителски вештини и да се грижат за своето ментално здравје и добросостојба, подобар пристап и квалитет на предучилишното образование и спроведување програми за учење за поддршка на холистичкиот развој на децата, реформа на образованието за преосмислување и ревитализација на учењето и обезбедување психо-социјална поддршка на наставниците за да останат движечка сила на реформите во образованието.
